Mali i Zi i pari në modelin e ri gjerman të shitjes së armatimeve “qeveri-me-qeveri”

Qeveria gjermane synon ta testojë shitjen e pajisjeve ushtarake sipas modelit “qeveri-me-qeveri” (Government-to-Government – G2G) përmes një projekti pilot me Malin e Zi, u bë e ditur në faqen zyrtare të Bundestagut. Parashikohet shitja e katër helikopterëve të tipit H145M të kompanisë Airbus Helicopters për Malin e Zi, partnerin në NATO.

Megjithatë, “Memorandumi i Mirëkuptimit” i nënshkruar deri më tani është vetëm një “deklaratë jo detyruese ligjërisht e qëllimit” dhe ende nuk është një kontratë blerjeje ligjërisht detyruese, tha qeveria federale gjermane në përgjigjen e saj (21/7895) ndaj iniciativës parlamentare të grupit Die Linke (21/7585).

Sipas qeverisë federale, shitja G2G synon të forcojë më tej partneritetet e sigurisë me shtete të tjera dhe aftësinë e bashkëpunimit të Bundeswehr-it mbi bazën e standardizimit dhe ndërveprueshmërisë, si dhe ruajtjen dhe zhvillimin e industrisë kombëtare të sigurisë dhe mbrojtjes. Shtetet e tjera anëtare të NATO-s tashmë e ofrojnë shitjen shtetërore G2G si një “shërbim të zakonshëm tregu”.

Në panairin e aviacionit ILA në Berlin, Gjermania dhe Mali i Zi nënshkruan në qershor një marrëveshje midis dy ministrive të mbrojtjes, mbi bazën e së cilës Aviacioni i Ushtrisë së Malit të Zi do të marrë katër helikopterë H145M të Airbus nga transha e fundit e porosisë gjermane për këtë tip helikopteri.

Ministri i Mbrojtjes së Malit të Zi, Dragan Krapoviq, dhe homologu i tij gjerman, Boris Pistorius, nënshkruan marrëveshjen për bashkëpunim më të ngushtë mbrojtës midis dy vendeve, e cila për Gjermaninë përbën bazën ligjore për shitjen e armatimeve sipas modelit qeveri-me-qeveri — model që Gjermania, ndryshe nga shumica e aleatëve të NATO-s, nuk e kishte zbatuar deri më tani si shitëse. Sipas njoftimit të Ministrisë së Mbrojtjes së Malit të Zi, bëhet fjalë për marrëveshjen e parë të këtij lloji që Gjermania ka lidhur, çka konfirmon nivelin e lartë të besimit dhe partneritetit midis dy shteteve.

Burimi: RTCG — https://rtcg.me/vijesti/drustvo/883620/crna-gora-prva-u-novom-modelu-prodaje-njemackog-naoruzanja.html