Mbi 1,000 hektarë digjen nga zjarret në Francën jugore

Më shumë se 1,000 hektarë tokë janë përfshirë nga zjarret në Francën jugore, ndërsa qindra zjarrfikës vijojnë betejën me flakët në kushte të vështira, të shkaktuara nga erërat e forta dhe temperaturat e larta.

Zjarri më i madh shpërtheu në komunën Pouzols-Minervois, në departamentin Herault, dhe më pas u përhap në Aude, duke djegur mbi 800 hektarë. Edhe pse u vu nën kontroll të enjten në mëngjes, autoritetet paralajmëruan se mbeten fronte aktive për shkak të erërave të vazhdueshme.

Rreth 350 banorë u evakuuan si masë parandaluese. Sipas autoriteteve, nuk janë dëmtuar banesa, por disa vreshta kanë pësuar dëme të konsiderueshme.

Ndërkohë, dy zjarre të tjera të mëdha shpërthyen në veri të Marsejës. Në Rognac, flakët u shuan gjatë natës pasi përfshinë rreth 50 hektarë, ndërsa u evakuuan pesë banesa dhe u dëmtuan disa objekte e automjete. Nuk raportohet për të lënduar.

Në Lancon-Provence, zjarrfikësit vazhdojnë operacionin për shuarjen e një zjarri që ka djegur rreth 200 hektarë tokë.

Zjarret kanë shkaktuar edhe ndërprerje në transportin hekurudhor, pasi shërbimet rajonale TER mes Marsejës dhe Miramas u pezulluan përkohësisht për shkak të afrimit të flakëve pranë linjës hekurudhore.