Me informacion nga policia maqedonase, në Francë sekuestrohen 68 kilogramë kokainë në kamionin e një 44-vjeçari

Siç njofton Ministria e Punëve të Brendshme, si rezultat i bashkëpunimit të suksesshëm ndërkombëtar policor dhe shkëmbimit në kohë të informacioneve operative nga Byroja për Siguri Publike pranë MPB-së, në territorin e Francës, në pikëpagesën Fonten, janë sekuestruar 68 kilogramë kokainë, të gjetur në një mjet motorik transporti që drejtohej nga shtetasi maqedonas M.F., 44 vjeç.

Sipas raportimit të Centar.mk, sekuestrimi është rezultat i informacioneve operative të siguruara nga Departamenti i Policisë Kriminalistike, përkatësisht Njësia për Tregti të Palejuar me Drogë, të cilat përmes Sektorit për Bashkëpunim Ndërkombëtar Policor dhe Europolit u janë përcjellë organeve kompetente franceze.

Ky është aksioni i dytë i suksesshëm ndërkombëtar brenda një muaji, pas bashkëpunimit të mëparshëm me policinë greke, i cili rezultoi me sekuestrimin e 324 kilogramëve marihuanë.

Nga MPB-ja theksojnë se këto rezultate e konfirmojnë efikasitetin e bashkëpunimit ndërkombëtar policor dhe përkushtimin e vazhdueshëm të Ministrisë në luftën kundër krimit të organizuar dhe tregtisë së palejuar me drogë.