Më shumë se 6,000 fluturime u anuluan të shtunën në SHBA, FAA thotë se trafiku ajror normalizohet deri të dielën

Kompanitë ajrore anuluan mijëra fluturime në të gjithë Shtetet e Bashkuara të shtunën, teksa rikuperoheshin nga ndalimi kombëtar i ngritjeve një ditë më parë që la pasagjerët në vështirësi dhe ndërpreu udhëtimet në mbarë botën, siç raporton Associated Press. Orari i fluturimeve pritet të kthehet në normalitet deri në fund të së dielës, dy ditë pas ndalimit kombëtar më të gjatë në 25 vjet, tha të shtunën në Uashington administratori i Administratës Federale të Aviacionit (FAA), Bryan Bedford, duke shtuar se të shtunën do të ketë ende vonesa dhe anulime, por se më e keqja ka kaluar.

Sipas FlightAware, më shumë se 6,000 fluturime brenda, drejt ose nga SHBA-ja u anuluan të shtunën. Sekretari i Transportit, Sean Duffy, tha se problemi nisi kur kontraktori L3Harris Technologies po zëvendësonte një pjesë të telit të vjetër të bakrit të sistemit të kontrollit ajror me tel me fibër optike dhe sistemi u mbingarkua, duke shkaktuar ndërprerje të herëpashershme të komunikimeve dhe boshllëqe në radarë, çka detyroi ndalimin e trafikut ajror për më shumë se katër orë. Zyrtarët po hetojnë nëse shkak u bë një router i dëmtuar apo puna e kontraktorit, ndërsa L3Harris tha se po mbështet hetimin e FAA-së për të kuptuar kushtet që çuan në ndalim.

Ky ishte ndalimi i parë kombëtar i fluturimeve që nga janari i vitit 2023, kur dështoi një sistem kyç kompjuterik i FAA-së, dhe i dyti që nga sulmet e 11 shtatorit 2001. Duffy përsëriti se më shumë se 3,000 avionët që ndodheshin në ajër kur u dha urdhri i ndalimit u ulën shëndoshë e mirë dhe se askush nuk u rrezikua. Administrata e presidentit Trump ka fajësuar Kongresin për mosmiratimin e fondeve për zëvendësimin e teknologjisë së vjetruar: Kongresi miratoi 12.5 miliardë dollarë vitin e kaluar për modernizimin, ndërsa Duffy dhe Shtëpia e Bardhë po kërkojnë 30 miliardë dollarë të tjera.