Merz i shkruan Kurtit për mandatin e ri: Gjermania qëndron fuqishëm përkrah Kosovës
Kancelari gjerman e përgëzoi kryeministrin Kurti për rizgjedhjen dhe theksoi miqësinë e veçantë me popullin e Kosovës, sipas njoftimit të Zyrës së Kryeministrit.
Kryeministri i Kosovës, Albin Kurti, ka pranuar dje një letër urimi për Qeverinë dhe mandatin e ri nga kancelari i Gjermanisë, Friedrich Merz, siç njofton Zyra e Kryeministrit në Kosovë përmes raportimit të KosovaPress-it.
“Ju përgëzoj përzemërsisht për rizgjedhjen Tuaj Kryeministër i Republikës së Kosovës. Kosova ka lënë pas muaj të tërë të pasigurisë politike, e cila i ka imponuar vendit kosto të larta. Konfirmimi i zgjedhjes Tuaj ofron mundësinë e ndërtimit të urave përtej prizmit partiak, zgjidhjes së çështjeve të hapura institucionale dhe avancimit të reformave”, shkroi kancelari Merz, cituar në njoftimin e Zyrës së Kryeministrit.
Krahas urimeve për sukses në mandatin e ri qeverisës, kancelari gjerman shkroi se Gjermania qëndron fuqishëm përkrah Kosovës, duke e theksuar miqësinë e veçantë me popullin e Kosovës.
Letra e urimit vjen pasi Kosova ka konstituar institucionet e reja pas një periudhe të gjatë bllokade politike, e cila kishte vonuar vendimmarrjen institucionale për muaj me radhë.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.