Micron bie dakord të paguajë 600 milionë dollarë për t’i dhënë fund betejës së patentave me Netlist

Kompania amerikane e memories Netlist njoftoi të martën se ka arritur një marrëveshje me Micron-in për t’i dhënë fund betejës shumëvjeçare të patentave mbi çipat e memories, siç njofton Reuters. Sipas marrëveshjes, Micron do t’i paguajë Netlist-it 600 milionë dollarë në këmbim të mbylljes së padive për shkelje patente.

Marrëveshja parashikon gjithashtu pagesë prej 30 milionë dollarësh në tremujor për një licencë pesëvjeçare të portofolit të patentave të Netlist, që përfshin teknologjinë e memories me bandë të lartë (high bandwidth memory) — komponent kyç në sistemet e inteligjencës artificiale.

Netlist kishte fituar në vitin 2024 një vendim prej 445 milionë dollarësh për shkelje patente kundër Micron-it në gjykatën federale të Marshallit, në Teksas. Në shtator, kompania ngriti një ankesë të re pranë Komisionit Amerikan të Tregtisë Ndërkombëtare (ITC), duke kërkuar bllokimin e importeve të çipave të memories të Micron-it që përdoren në produktet e Google, Nvidia dhe Broadcom për llogaritjen e inteligjencës artificiale.

“Kjo marrëveshje vërteton më tej vlerën e teknologjive tona të memories për AI”, deklaroi shefi ekzekutiv i Netlist, C.K. Hong, duke shtuar se kompania mbetet e përkushtuar në mbrojtjen e pronësisë së saj intelektuale. Zëdhënësit e Micron-it nuk iu përgjigjën menjëherë kërkesës për koment.

Netlist zgjidhi në gusht një betejë të veçantë mbi patentat me gjigantin Samsung, pas vendimeve prej 421 milionë dollarësh në favor të saj në Teksas.