Milivojeviç: Kush nuk rreshtohet pas Listës Studentore, e ndihmon Vuçiçin

Kryetari i Partisë Demokratike të Serbisë, Srđan Milivojeviç, ka deklaruar se kushdo që nuk rreshtohet nën flamurin e lirisë të ngritur lart nga studentët, nuk po punon për të mirën e përgjithshme dhe për çlirimin e vendit, por — me vetëdije ose pa vetëdije — e ndihmon Aleksandar Vuçiçin. Deklaratat i bëri në një intervistë për portalin “Simptom”.

Sipas Milivojeviçit, në Serbi nuk ka më vend për kolonat ideologjike. Shoqëria dhe shteti, tha ai, gjenden përpara një pyetjeje të vetme: “ose Serbia, ose mafia”.

I pyetur se si e sheh natën e zgjedhjeve, duke pasur parasysh se duket se pushteti është gati për gjithçka, kreu i demokratëve serbë u shpreh: “E dimë me kë kemi të bëjmë — me njerëz pa frena morale dhe me arsenale të pakufizuara të së keqes… Nuk ka dyshim se do ta përdorin me kapacitet të plotë, por në anën tjetër janë njerëz trima të gatshëm t’i kundërvihen së keqes. Problemi për atë sistem të së keqes është kur njerëzit shohin se gjithçka ka mbaruar, se ka një milion njerëz në rrugë”.

Ai tha se është “absolutisht i bindur se po vjen fitorja e zemrës trimë dhe duarve të pastra”, duke shtuar se “lista që propozuan studentët është lista e zemrës trimë dhe duarve të pastra. Nuk ka forcë të errët që ta mundë atë. Jemi në rrugën e çlirimit të Serbisë”.

Burimi: Danas