Ministri Tajani: Italia e gatshme të mbështesë në mënyrë diplomatike marrëveshjen Izrael-Liban

Ministri i Jashtëm italian, Antonio Tajani ka deklaruar se Roma është gati të ofrojë mbështetje diplomatike për marrëveshjen e sapo nënshkruar Izrael-Liban dhe mund të kontribuojë në një mision ndërkombëtar të ardhshëm pas mandatit të forcës paqeruajtëse të OKB-së.

Duke folur në një konferencë për shtyp në Dubrovnik të Kroacisë, ku po merr pjesë në një forum ndërkombëtar dhe në samitin MED-9, Tajani e përshkroi marrëveshjen si një hap përpara, ndërsa paralajmëroi se do të duhet kohë që situata të stabilizohet.

“Është e rëndësishme që qëllimi i nënshkrimit është arritur tashmë”, tha ai, duke shtuar se Italia është e përgatitur të ofrojë mbështetje diplomatike dhe të luajë një rol me forcat e armatosura, me një mision ndërkombëtar pas UNIFIL.

Ministri shtoi se Italia, së bashku me Francën, mund të luajnë “një rol të rëndësishëm” në rindërtimin e Libanit, duke përfshirë forcimin e institucioneve të tij për të garantuar më mirë sovranitetin e vendit.

Lidhur me mundësinë e një misioni pas UNIFIL-it, Tajani theksoi se çdo vendosje ndërkombëtare do të duhej të bazohej në një marrëveshje shumëpalëshe dhe tha se pjesëmarrja nga vendet arabe dhe të Gjirit nuk duhet të përjashtohet.