Miratohet me 84 vota projektligji për pagat e magjistratëve, hyn menjëherë në fuqi

Kuvendi i Shqipërisë miratoi me 84 vota pro dhe 24 kundër projektligjin “Për statusin e gjyqtarëve dhe prokurorëve në Republikën e Shqipërisë”, që lidhet me përcaktimin e pagave të magjistratëve.

Ky projektligj hynë në fuqi menjëherë pas pëlqimit që ka dhënë dhe Presidenti Bajram Begaj, njoftoi kreu i Kuvendit, Niko Peleshi.

Ky vendim vjen pas kërkesës së magjistratëve, e cila u pranua nga Gjykata Kushtetuese. Ndërkohë, Kuvendi, përmes dy deputetëve, depozitoi javën e kaluar projektligjin që u votua sot në seancë plenare.

Miratimi i projektligjit është kundërshtuar nga përfaqësues të sistemit të drejtësisë. Shoqatat e gjyqtarëve dhe prokurorëve kanë deklaruar se formula e propozuar nuk përputhet me standardet e vendosura nga Gjykata Kushtetuese dhe kanë paralajmëruar ndjekjen e çështjes në Gjykatën Kushtetuese.

Edhe Gjykata e Lartë ka kërkuar që projektligji të mos kalojë për votim pa vijuar konsultimi institucional me sistemin e drejtësisë.

Në seancën e sotme, kërkesa e opozitës për heqjen e projektligjit nga rendi i ditës dhe vijimin e konsultimeve nuk u pranua, ndërsa Kuvendi vijoi me shqyrtimin dhe miratimin e tij.