Mistral prezanton model të ri të inteligjencës artificiale që, sipas kompanisë, i tejkalon modelet kineze në sigurinë kibernetike

Drejtori ekzekutiv i kompanisë franceze të inteligjencës artificiale Mistral, Arthur Mensch, njoftoi të martën në konferencën "Ai Everything" në Abu Dhabi një model të ri të kompanisë, siç njofton Reuters. Modeli pritet të zbulohet zyrtarisht më vonë gjatë ditës.

Sipas kompanisë, modeli i ri "është mbi modelet kineze në disa aspekte, përfshirë sigurinë kibernetike", tha Mensch në skenë, duke shtuar se narrativi që Evropa nuk mund të konkurrojë "nuk është i vërtetë". Ai nuk specifikoi cilat modele kineze kishte parasysh apo me çfarë kriteri bëhej krahasimi, sipas raportimit të Reuters.

Mistral, kompani trevjeçare franceze, shihet si pretenduesja më e fortë evropiane në garën globale të IA-së, por mbetet shumë më e vogël se Anthropic dhe OpenAI dhe nën presionin e rivalëve kinezë me kosto më të ulët. Modeli i fundit i kompanisë kishte dalë në prill. Në shtator Mistral mblodhi 3 miliardë euro me një vlerësim prej 21 miliardë eurosh, duke u pozicionuar si alternativa më e sigurt evropiane.

Mensch tha se pavarësia nga Shtetet e Bashkuara dhe Kina po i mundëson kompanisë rritje të shpejtë në Gjirin Persik dhe Azinë-Paqësor, ku sipas tij "ka një dëshirë dhe nevojë të madhe për furnitorë alternativë teknologjie".