Momente paniku në Korçë! Automjeti godet karrocën me fëmijën e vogël

Një aksident rrugor është regjistruar në lagjen 10 të qytetit të Korçës, në zonën e njohur si “Dritat e Verdha”.
Mësohet se një automjet ka përplasur një karrocë në të cilën ndodhej një fëmijë 1 vjeç e gjysmë.

Sipas informacioneve paraprake, nëna po kalonte rrugën së bashku me fëmijën, kur automjeti ka goditur karrocën.

Menjëherë pas aksidentit, ka qenë vetë drejtuesi i automjetit ai që e ka transportuar të miturin në Urgjencën e Spitalit të Korçës.

Burime spitalore bëjnë me dije se fëmija ndodhet jashtë rrezikut për jetën dhe po merr ndihmën e nevojshme mjekësore.

Ndërkohë, policia ka kryer veprimet procedurale me drejtuesin e automjetit dhe po punon për zbardhjen e plotë të rrethanave dhe shkaqeve të aksidentit.