MOSKË – Sulm ukranias me dronë gjatë zgjedhjeve parlamentare

MOSKË, 20 shtator /ATSH-DPA/ – Ukraina ka goditur Moskën me dronë, duke shkaktuar vdekjen e të paktën dy personave, sipas zyrtarëve rusë.

Më shumë se 180 dronë janë interceptuar, raportoi agjencia shtetërore ruse e lajmeve TASS, duke cituar kryebashkiakun e Moskës, Sergei Sobyanin.

Guvernatori i rajonit të Moskës, Andrei Vorobyov, deklaroi se dy persona kishin humbur jetën dhe të paktën gjashtë të tjerë, përfshirë dy fëmijë, ishin plagosur.

Informacioni nuk ishte i mundur të verifikohej në mënyrë të pavarur në momentin e raportimit.

Sulmi me dronë ndodhi në ditën e fundit të zgjedhjeve parlamentare treditore në Rusi, të cilat pritet të konfirmojnë dominimin e partive besnike ndaj Kremlinit në Dumë.

Zgjedhjet zhvillohen në një kohë kur lufta në Ukrainë vazhdon të jetë një çështje qendrore për vendin.

Këto janë zgjedhjet e para për Dumën që nga nisja e pushtimit në shkallë të plotë të Ukrainës nga Rusia, në shkurt të vitit 2022.

Zgjedhjet janë cilësuar si një referendum mbi vazhdimin e luftës, ndërsa kritikët e kanë konsideruar procesin të padrejtë që përpara fillimit, pasi opozita është penguar të marrë pjesë.

Rusia ka kryer vazhdimisht sulme ndaj qyteteve ukrainase me raketa balistike, raketa lundruese, bomba të drejtuara dhe dronë.

Ukraina, e mbështetur nga ndihma ushtarake perëndimore, u është përgjigjur me sulme ndaj territorit rus, duke përdorur kryesisht dronë me kosto relativisht të ulët dhe prodhim të shpejtë, si dhe raketa lundruese.