Ndërron jetë 7-vjeçarja nga Pavlani i Pejës që u zu nga dollapi në shtëpi

Një vajzë shtatëvjeçare nga fshati Pavlan i komunës së Pejës ka ndërruar jetë mbrëmjen e së hënës në Qendrën Klinike Universitare të Kosovës (QKUK) në Prishtinë.

Vogëlushja ishte dërguar me urgjencë në spital të dielën, pasi dyshohet se ishte zënë nga një dollap në shtëpinë e saj. Gjendja e saj ishte e rëndë, ndaj ajo po trajtohej në QKUK dhe qëndronte e intubuar.

Pavarësisht përpjekjeve të mjekëve, 7-vjeçarja nuk arriti t’u mbijetojë lëndimeve të marra, siç njofton Gazeta Sinjali. Lajmin për vdekjen e saj e ka raportuar edhe Indeksonline, sipas raportimit të të cilit vogëlushja nuk i ka përballuar plagët e marra nga incidenti në shtëpi.

Varrimi i 7-vjeçares bëhet sot, të martën, në orën 15:00 në varrezat e fshatit Pavlan.

Familjarë, të afërm dhe banorë të fshatit pritet t’i japin lamtumirën e fundit vogëlushes, në një ditë zie për familjen e saj dhe për gjithë komunitetin.