“Në 35 vite, njëri më maskara se tjetri”/ Protestuesit sulmojnë gjithë klasën politike: Rama dhe Berisha nuk na përfaqësojnë më!

TIRANË – Protesta që po vazhdon në kryeqytet po merr gjithnjë e më shumë karakterin e një revolte kundër gjithë klasës politike shqiptare. Përveç thirrjeve kundër qeverisë dhe kryeministrit Edi Rama, nga sheshi po dëgjohen edhe kritika të forta ndaj opozitës dhe liderit historik të saj, Sali Berisha.

Në fjalimet e mbajtura para mijëra protestuesve, një nga mesazhet që u prit me duartrokitje dhe brohoritje ishte ai i një qytetari që akuzoi të gjithë klasën politike për dështimet e 35 viteve të tranzicionit.

“Në 35 vite, njëri më maskara se tjetri”, deklaroi ai nga podiumi, duke ndezur reagimin e menjëhershëm të turmës.

Protestuesi iu drejtua drejtpërdrejt kryeministrit Edi Rama dhe kreut të Partisë Demokratike, Sali Berisha, duke thënë se qytetarët nuk ndihen më të përfaqësuar nga asnjëri prej tyre.

“Si Berisha ashtu edhe Rama duhet të hapin veshët dhe të dëgjojnë mesazhin që vjen qartë nga ky shesh. Ju nuk na përfaqësoni më”, u shpreh ai mes duartrokitjeve të protestuesve.

Sipas tij, pakënaqësia nuk kufizohet vetëm te qytetarët që kanë mbushur sheshin në Tiranë, por shtrihet edhe te shqiptarët që jetojnë jashtë vendit.

“Shumica e popullit shqiptar këtu dhe në diasporë ka një mesazh të qartë për ju: Rama dhe Berisha, jeni të pushuar nga puna”, deklaroi protestuesi, ndërsa turma shpërtheu në brohoritje.

Fjalimi pasqyroi një nga tendencat më të dukshme të protestave të ditëve të fundit: zhgënjimin jo vetëm ndaj qeverisë aktuale, por edhe ndaj alternativave tradicionale politike që kanë dominuar jetën publike shqiptare gjatë dekadave të fundit.

Ndërsa protesta vazhdon në qendër të Tiranës, pjesëmarrësit këmbëngulin se kërkesat e tyre shkojnë përtej kundërshtimit të projektit në Zvërnec. Sipas tyre, bëhet fjalë për një kërkesë më të gjerë për ndryshim politik, transparencë, respektim të ligjit dhe një model të ri përfaqësimi.

Me kalimin e orëve, turma jo vetëm që nuk është shpërndarë, por vazhdon të mbetet e mobilizuar. Mes flamujve kombëtarë, pankartave dhe thirrjeve kundër establishmentit politik, protesta po shndërrohet në një forum të hapur pakënaqësie ndaj klasës politike që ka drejtuar vendin gjatë 35 viteve të fundit.