Në kërkim për ndërtimet pa leje, dorëzohet ish-oficeri i Policisë së Sarandës

Ish-shefi i Policisë, Irakli Koçiaj, është dorëzuar në Komisariatin e Policisë së Sarandës, pasi ishte shpallur në kërkim prej 25 majit.

Koçiaj, ish-oficer i krimeve për zonën e Ksamilit, ishte shpallur në kërkim që prej 25 majit, pas urdhër-arrestit të lëshuar nga Prokuroria e Sarandës për veprën penale “shpërdorim detyre”. Ai dyshohet për favorizim të ndërtimeve pa leje në Ksamil.

Deri tani, në kuadër të kësaj çështjeje janë arrestuar 8 ish-efektivë të Policisë së Sarandës.

Dy prej tyre, përfshirë ish-shefin e komisariatit, ndodhen në burg me afat 30-ditor dhe pritet t’u rivlerësohet masa e sigurisë në ditët në vijim ndërkohë, 5 të tjerë janë lënë në “arrest shtëpie”.

Koçiaj pritet të dalë para Gjykatës në dy ditët e ardhshme.