NJU DELHI – Lavrov: Rusia e gatshme për negociata me Ukrainën, por jo për armëpushim

NJU DELHI, 12 shtator /ATSH-DPA/– Rusia është e gatshme të zhvillojë negociata me Ukrainën, por nuk pranon të ndalojë luftimet gjatë bisedimeve, deklaroi sot ministri i Jashtëm rus Sergei Lavrov, sipas agjencisë shtetërore ruse TASS.

“Ne mbetemi të gatshëm për negociata, por operacioni ushtarak nuk do të pezullohet gjatë negociatave”, tha Lavrov në kuadër të samitit të BRICS-it, në Nju Delhi.

Lavrov përsëriti gjithashtu ftesën e Rusisë për bisedime në Moskë, drejtuar presidentit ukrainas Volodymyr Zelensky.

“Nëse dëshiron të takohet, le të vijë”, tha ai, duke e cilësuar këtë si një gjest të madh vullneti të mirë nga ana e Rusisë.

Zelensky e ka refuzuar kategorikisht këtë propozim, të bërë më herët edhe nga presidenti rus, Vladimir Putin.

Ndërkohë, SHBA-ja po përpiqet të rikthejë negociatat mes Rusisë dhe Ukrainës.

Është përmendur edhe mundësia e një takimi tripalësh mes Putinit, Zelensky dhe presidentit amerikan, Donald Trump.

BRICS përfshin Brazilin, Rusinë, Indinë, Kinën, Afrikën e Jugut, si dhe Arabinë Saudite, Iranin, Egjiptin, Etiopinë, Emiratet e Bashkuara Arabe dhe Indonezinë. /