“Nuk ka besë me Ramën”/ Protestuesi: Pas dorëheqjes e pret drejtësia

Gjatë protestës së zhvilluar përpara Kryeministrisë, një nga aktivistët deklaroi se qytetarët nuk mund t’i japin më besë kryeministrit Edi Rama, pasi, sipas tij, ai e ka shkelur vazhdimisht besimin e shqiptarëve gjatë 13 viteve në pushtet.

Duke folur nga podiumi, protestuesi theksoi se tubimi ka hyrë në ditën e 55-të dhe se pjesëmarrësit do të vazhdojnë të qëndrojnë në shesh deri në dorëheqjen e kryeministrit.

“Sot është dita e 55-të që jemi në shesh pa ndërprerje për të kërkuar dorëheqjen e këtij kryeministri. Kryeministri u shfaq me zë dhe figurë duke na kërkuar besën, por a mund t’i jepet besa dikujt që na ka prerë në besë për 13 vite me radhë?”, tha ai.

Aktivisti akuzoi qeverinë se po përpiqet t’i frikësojë protestuesit dhe t’i largojë ata nga sheshi, në mënyrë që pushteti të vazhdojë si më parë.

“Nuk ka besë për ty, kryeministër. Vetëm dje i preve në besë qytetarët që protestojnë prej 55 ditësh. Po përpiqesh të na frikësosh, që të shkojmë në shtëpi dhe ti të vazhdosh. Por ne nuk do ta lejojmë këtë”, deklaroi ai.

Sipas protestuesit, dorëheqja është e vetmja rrugë që i ka mbetur kryeministrit, por ajo nuk duhet ta përjashtojë nga përballja me drejtësinë.

“Ai e di se nuk ka shpëtim. I vetmi shpëtim nga ky makth është dorëheqja. Rama po përpiqet ta zbusë situatën dhe kërkon që, pasi të japë dorëheqjen, t’i shpëtojë drejtësisë. Por pas dorëheqjes e pret drejtësia”, u shpreh aktivisti.

Ai përsëriti gjithashtu kërkesën e protestuesve për krijimin e një qeverie tranzitore, e cila, sipas tij, duhet të krijojë kushtet për funksionimin e demokracisë dhe reformimin e sistemit politik.

“Pas dorëheqjes vjen kërkesa e dytë, krijimi i një qeverie tranzitore, në mënyrë që sistemi të marrë oksigjen dhe të mundësohet demokracia që mungon dhe që është marrë peng nga një sistem i inkriminuar”, përfundoi ai.