OKB: Epidemia e Ebolës mund t’i kushtojë Afrikës deri në 3.6 miliardë dollarë

Kombet e Bashkuara kanë paralajmëruar se shpërthimi aktual i Ebolës mund t’i kushtojë ekonomisë afrikane deri në 3.6 miliardë dollarë dhe të shkatërrojë qindra mijëra vende pune, duke u përshkallëzuar në një krizë serioze zhvillimi.

“Nëse kemi burimet dhe ndërmarrim hapa, mund ta përmbajmë këtë epidemi dhe të parandalojmë humbje të mëtejshme”, tha Damien Mama, Përfaqësues i Përhershëm i Programit të Zhvillimit të Kombeve të Bashkuara (UNDP) në Republikën Demokratike të Kongos.

Ai theksoi se përndryshe kriza shëndetësore mund të shndërrohet në një krizë zhvillimi shumë më të thellë dhe të zgjatur në të gjithë rajonin, por edhe në nivelin e të gjithë kontinentit, raporton Reuters.

Republika Demokratike e Kongos tha se numri i rasteve të konfirmuara të Ebolës në vend kishte arritur në 1,307, përfshirë 377 vdekje.

Sipas të dhënave zyrtare, raste të infeksionit u regjistruan në provincat Ituri, Kivu Veriore dhe Kivu Jugore.

Drejtori i Përgjithshëm i Organizatës Botërore të Shëndetësisë (OBSH), Tedros Adhanom Ghebreyesus, tha se rreziku i përhapjes së mëtejshme ndërkombëtare të sëmundjes vlerësohet si i ulët për momentin, por theksoi se situata kërkon monitorim të kujdesshëm.