PAKISTAN – Autobusi bie në humnerë, të paktën 40 të vdekur

– Të paktën 40 persona humbën jetën dhe tetë të tjerë mbetën të plagosur, pasi një autobus që lëvizte me shpejtësi doli nga rruga dhe ra në një humnerë, në provincën e Balochistan-it, në jugperëndim të Pakistanit, njoftuan autoritetet.

Autobusi ishte nisur nga qyteti i Quetta-s drejt Peshawar-it, kur aksidenti ndodhi rreth mesit të itinerarit.

Sipas zyrtarit të policisë Ali Raza, dyshohet se shpejtësia e lartë ka qenë shkaku kryesor i tragjedisë, megjithatë hetimet do të përcaktojnë arsyen e saktë të aksidentit.

Zyrtarët e shpëtimit bënë të ditur se, përdorën pajisje prerëse dhe makineri të posaçme, për të nxjerrë viktimat dhe të plagosurit nga autobusi, i cili ishte shkatërruar plotësisht nga rënia.

Të plagosurit dhe trupat e viktimave, u transportuan me ambulanca drejt spitaleve dhe klinikave më të afërta.

Sipas autoriteteve, disa prej të plagosurve, ndodhen në gjendje kritike, dhe ekziston frika se numri i viktimave mund të rritet.

Pakistani përballet çdo vit, me mijëra viktima në aksidente rrugore, të shkaktuara kryesisht nga infrastruktura e dobët, mirëmbajtja e pamjaftueshme e mjeteve dhe standardet e ulëta të sigurisë në trafik. /