Parlamenti Evropian miraton raportin: Rusia kërcënimi kryesor për demokracinë, Serbia ‘qendër kryesore e dezinformimit’

Të martën, Parlamenti Evropian miratoi me 420 vota pro, 220 kundër dhe 26 abstenime raportin e Komitetit të Posaçëm për Mburojën Evropiane për mbrojtjen e demokracisë — një dokument që e veçon Rusinë si kërcënimin kryesor për integritetin demokratik të Evropës. Në raport përmenden gjithashtu Bjellorusia, Kina, Irani dhe Koreja e Veriut si pjesëmarrëse në sulme hibride, që përfshijnë sulme kibernetike, sabotime fizike e zjarre, spiunazh dhe bllokim sinjalesh.

Eurodeputetët kërkojnë zgjerimin e sanksioneve ndaj shpërndarësve të dezinformimit dhe ndaj individëve që ndihmojnë anashkalimin e sanksioneve ekzistuese. Raporti, i hartuar nga eurodeputeti suedez i EPP-së Tomas Tobé, kërkon gjithashtu krijimin e Qendrës Evropiane për Qëndrueshmërinë Demokratike, përgjegjësi më të madhe për platformat digjitale dhe shpalljen e infrastrukturës zgjedhore si infrastrukturë kritike.

Një pjesë e rëndësishme e raportit i kushtohet Serbisë, e cila përmendet në mënyrë të drejtpërdrejtë si vend që “është bërë qendër kryesore e dezinformimit dhe ndërmjetëse e operacioneve ruse të ndikimit, në masë më të vogël edhe kineze”. Sipas vendimeve gjyqësore moldave të cituara në raport, Serbia dhe entiteti boshnjak Republika Serbe kanë shërbyer si streha e një kampi militant trajnimi të lidhur me Rusinë, ku u rekrutuan dhe u stërvitën agjitatorë për të shkaktuar trazira masive gjatë zgjedhjeve dhe referendumeve në Moldavi.

Sipas raportit, infrastruktura kibernetike serbe u përdor për sulme “spear-phishing” kundër zyrtarëve të BE-së dhe NATO-s, përfshirë përvetësimin e identitetit të një konference sigurie në Beograd. Serbia përshkruhet më tej si strehë e sigurt për spiunët dhe oligarkët rusë, të cilët ndjekin opozitën ruse dhe gjejnë mënyra për anashkalimin e sanksioneve.

Raporti thotë gjithashtu se shtetas serbë, të lidhur me Rusinë, u arrestuan në Francë dhe Gjermani për akte të motivuara nga urrejtja, përfshirë vandalizëm ndaj objekteve hebraike me qëllim nxitjen e mosdurimit etnik dhe fetar. Mes kërkesave të tjera të eurodeputetëve janë parimi “njih donatorin tënd” për donacionet politike në kriptomonedha, si dhe mbrojtja e medias së lirë dhe gazetarisë investigative.

Burimi: Danas