Picula në Parlamentin Evropian: Vuçiç i dha nderime shtetërore kriminelit të luftës Mlladiç, ndërsa me Sheshelin bëri aleancë zgjedhore

Eurodeputeti kroat Tonino Picula, raportues i Parlamentit Evropian për Serbinë, deklaroi në debatin e Parlamentit Evropian për lavdërimin e Ratko Mlladiçit se presidenti serb Aleksandër Vuçiç „një krimineli lufte i dha lamtumirën me nderime shtetërore, ndërsa me tjetrin, Vojislav Sheshelin, bëri aleancë parazgjedhore“.

Picula tha se varrimi i Mlladiçit identifikoi politikën e Beogradit zyrtar dhe ngriti pyetjen nëse Serbia duhet të vijojë negociatat me Bashkimin Evropian nën një pushtet të tillë. Ai theksoi se në BE duhet luftuar revizionizmi historik dhe relativizimi i krimeve, duke kujtuar se ky debat zhvillohet në një kohë kur vlerat themelore evropiane po sfidohen hapur.

Në prag të debatit, Partia Popullore Evropiane (EPP) dënoi pjesëmarrjen e zyrtarëve të lartë serbë në varrimin e Mlladiçit. Ndërkaq, komisionerja evropiane për zgjerim, Marta Kos, i tha eurodeputetes Željka Zovko se Komisioni Evropian e ka bërë të qartë se çdo lavdërim i kriminelëve të luftës është i papajtueshëm me vlerat e Bashkimit Evropian.

Mlladiçi, ish-komandanti i ushtrisë së Republikës Serbe, i dënuar nga gjykata e Hagës për gjenocid dhe krime lufte, u varros më 7 shtator në varrezat Topçider të Beogradit, me praninë e ministrave serbë, Milorad Dodikut, Danillo Vuçiçit dhe ambasadorit rus në Serbi.

Debati i sotëm nuk i mbyll diskutimet për Serbinë në Parlamentin Evropian: në tetor priten edhe dy seanca të tjera, ku tema do të jenë edhe gjendja e demokracisë dhe zgjedhjet e 25 tetorit.

Burimi: Nova.rs