“Po mbrojmë veten dhe Evropën”, Zelensky: Ukraina ka nevojë për anëtarësim të plotë në BE, jo në formë simbolike

Me një kredi prej 90 miliardë eurosh për Ukrainën dhe një raund të ri sanksionesh kundër Rusisë të zhbllokuara dhe më në fund të miratuara, fokusi në një

Me një kredi prej 90 miliardë eurosh për Ukrainën dhe një raund të ri sanksionesh kundër Rusisë të zhbllokuara dhe më në fund të miratuara, fokusi në një samit informal në Qipro po zhvendoset me shpejtësi te vetoja e gjatë e Hungarisë ndaj pranimit të Kievit në BE, mes shpresave për të përdorur vrullin politik në Budapest, ndërsa një qeveri e re përgatitet të marrë detyrën.

Por presidenti Volodymyr Zelensky këmbënguli të enjten se ajo që i duhet Ukrainës është anëtarësimi i plotë dhe jo ndonjë lloj pjesëmarrjeje e pjesshme.

Duke folur me gazetarët gjatë rrugës për në Qipro, Zelensky hodhi poshtë idenë e anëtarësimit të pjesshëm në BE për Ukrainën, duke thënë se “Ukraina nuk ka nevojë për anëtarësim simbolik në BE”.

“Ukraina po mbron veten dhe padyshim që po mbron Evropën. Dhe nuk po e mbron Evropën simbolikisht,njerëzit po vdesin vërtet”, tha ai.

Ai tha se Ukraina po mbron “vlerat e përbashkëta evropiane” dhe për këtë arsye beson se vendi meriton anëtarësim të plotë në bllokun prej 27 vendesh.

Ai pranoi se po zhvillohen diskutime në “nivele të ndryshme” lidhur me “formatet e ndryshme të mundshme të anëtarësimit të Ukrainës në BE”.

“Dua të falenderoj të gjithë partnerët tanë, të gjithë udhëheqësit e Bashkimit Evropian: Gjermaninë, Francën, Poloninë, Rumaninë dhe të gjitha vendet që mbështesin vërtet anëtarësimin e shpejtë të Ukrainës në Bashkimin Evropian dhe po kërkojnë mënyra për ta përshpejtuar atë. Por këtu do të doja të thoja: le të jemi të drejtë. Do të doja të paralajmëroja, para së gjithash, institucionet tona ukrainase: ju lutem mos kërkoni anëtarësim simbolik në BE për Ukrainën. Unë nuk e mbështes këtë. Populli nuk e mbështet. Ajo që ka më shumë rëndësi është populli ynë. Ne kemi pasur mjaft bashkime simbolike, Memorandumet e Budapestit, garancitë simbolike të sigurisë, NATO-n, një rrugë simbolike drejt NATO-s. Ne meritojmë anëtarësim të plotë në aleanca të ndryshme dhe, sigurisht, në Bashkimin Evropian”, është shprehur Zelensky.

Pranimi i Ukrainës në BE ka qenë në ngërç që nga korriku i vitit 2024, kur Hungaria mori përsipër presidencën gjashtëmujore të Këshillit të BE-së dhe e bëri të qartë se Kievi nuk do të hapte asnjë grup të vetëm negociatash gjatë rotacionit.

Ish- kryeministri Viktor Orban që atëherë ka vazhduar të bllokojë hapjen e grupeve, duke e mbajtur procesin në bllokim.

Në një deklaratë të përbashkët me Zelensky-n dhe presidentin e Komisionit Evropian pas mbërritjes në samitin e Qipros, Presidenti i Këshillit Evropian António Costa tha se duke zhbllokuar kredinë prej 90 miliardë eurosh për Ukrainën dhe raundin e ri të sanksioneve kundër Rusisë, BE-ja ndërmori “dy hapa shumë të rëndësishëm për të arritur një paqe të drejtë dhe të qëndrueshme në Ukrainë”.