“Prokuror mashtrues, më i dëmshëm se Dick Marty” — Greiçevci i ashpër me Williamsonin

Lirim Greiçevci, anëtar i ekipit mbrojtës të ish-presidentit Hashim Thaçi, ka reaguar ashpër ndaj ish-prokurorit amerikan Clint Williamson, i cili udhëhoqi hetimin e pretendimeve të raportit të Dick Martyt për trafikim organesh, siç njofton Vox Kosova.

Në një status të publikuar në rrjetet sociale, Greiçevci e quan Williamsonin “prokuror mashtrues” dhe e cilëson atë si “më të dëmshëm se Dick Marty”, duke e akuzuar për gënjeshtra rreth hetimit të pretendimeve të raportit famëkeq.

Greiçevci pretendon se me hetimet e Williamsonit janë shpërdoruar qindra miliona dollarë të taksapaguesve amerikanë, ndërsa shton se aktakuza “fantazmë” që sipas tij do të bëhej publike nuk u ngrit kurrë. Në status përmenden edhe David Schwendimani dhe Jack Smithi, të cilët së bashku me Williamsonin cilësohen si “mashtrues” që sipas Greiçevcit nuk patën ndershmërinë dhe kurajën t’i dilnin përballë drejtësisë së vërtetë.

Reagimi vjen pasi Williamson, në një intervistë të dhënë së fundmi për BIRN-in, u shpreh se autoritetet e Kosovës kishin dështuar të uleshin pritjet e publikut se ish-liderët e UÇK-së që po gjykohen në Hagë do të shpallen të pafajshëm.

Hashim Thaçi, Kadri Veseli, Rexhep Selimi dhe Jakup Krasniqi po përballen me akuza për krime lufte dhe krime kundër njerëzimit në Gjykatën Speciale në Hagë, proces i cili ka hyrë tashmë në fazën e apelit, siç raporton edhe Klan Kosova.