Prokuroria Speciale ngre aktakuzë ndaj shtatë personave për kontrabandim me migrantë

Prokuroria Speciale e Kosovës ka ngritur aktakuzë ndaj shtatë personave, të dyshuar për pjesëmarrje ose organizim të grupit kriminal të organizuar dhe për kontrabandim me migrantë, siç njofton Gazeta Sinjali.

Sipas aktakuzës, të pandehurit me inicialet B.H., A.B., Sh.T., E.Zh., G.Sh., A.M. dhe L.A. dyshohet se gjatë viteve 2023–2024 kanë vepruar në territorin e Kosovës si pjesë e një grupi kriminal të organizuar, me qëllim përfitimi të kundërligjshëm material nga kontrabandimi i migrantëve.

Prokuroria i paraqet të pandehurit si pjesë të një strukture të qëndrueshme kriminale, me role të ndara, planifikim paraprak dhe koordinim të vazhdueshëm. Migrantët, shtetas nga Siria, Afganistani, Iraku dhe vende të tjera të Lindjes së Mesme dhe Azisë, sipas aktakuzës nuk kishin dokumentacion të rregullt për hyrje apo qëndrim në Kosovë.

Sipas raportimit të Sinjalit, grupi dyshohet se i siguronte migrantët në territorin e Shqipërisë dhe i fuste në Kosovë jashtë pikave të autorizuara kufitare, përmes shtigjeve malore dhe rrugëve alternative në zonën Gorozhup–Vërmicë. Për secilin migrant, sipas aktakuzës, paguhej një shumë deri në katër mijë euro për të gjithë itinerarin e migrimit drejt Evropës.