Protestë edhe në Zvërnec, qytetarët me pankarta dhe thirrje

Përfaqësues të shoqërisë civile, aktivistë dhe qytetarë janë mbledhur sot në zonën e Porto Novos dhe në plazhin e Dalanit për të protestuar kundër projektit të zhvillimit turistik në Zvërnec.

Me pankarta ku shkruhej “Larg duart nga Narta” dhe flamuj kuqezi, protestuesit marshuan përgjatë vijës bregdetare, duke kërkuar mbrojtjen e natyrës dhe të zonës së Nartës.

Sipas tyre, kjo zonë ka një rëndësi të veçantë si për komunitetin lokal, ashtu edhe për qytetin e Vlorës në tërësi, duke theksuar nevojën për ruajtjen e saj nga ndërhyrjet ndërtimore.

Ndërkohë, në rrjetet sociale është njoftuar se protesta pritet të vijojë më vonë në bulevardin “Dëshmorët e Kombit” në Tiranë, në orën 18:00.

Prej gjashtë ditësh, qytetarë dhe aktivistë kanë protestuar në kryeqytet, duke kërkuar anulimin e projektit për ndërtimin e një resorti në Zvërnec, për shkak të shqetësimeve mbi ndikimin e tij në mjedis dhe në pasuritë natyrore të zonës.

Protestuesit kanë artikuluar pesë kërkesa kryesore: dorëheqjen e kryeministrit; shfuqizimin e statusit dhe kuadrit ligjor për investitorët strategjikë; shfuqizimin e Paketës së Maleve; anulimin e ndryshimeve në Ligjin për Zonat e Mbrojtura; si dhe anulimin e ndryshimeve në Ligjin për Trashëgiminë Kulturore.