Qeveria çon në Kuvend marrëveshjen me Maqedoninë e Veriut, parashikohen pika të përbashkëta kufitare dhe kontrolle të un

Këshilli i Ministrave ka miratuar vendimin për t’i propozuar Kuvendit të Shqipërisë ratifikimin e marrëveshjes me qeverinë e Maqedonisë së Veriut, e cila parashikon ngritjen e pikave të përbashkëta të kalimit kufitar dhe unifikimin e veprimtarive të kontrollit mes dy vendeve.

Nisma, e cila vjen pas propozimit të Ministrit të Punëve të Brendshme, synon të vendosë një kuadër të ri për menaxhimin e kufirit shtetëror dypalësh.

Vendimi qeveritar i hap rrugë procedurës parlamentare, ku marrëveshja do t’i nënshtrohet diskutimit dhe miratimit nga ligjvënësit. Drafti mbështetet në Kushtetutën e Shqipërisë, në ligjin për marrëveshjet ndërkombëtare, si dhe në ligjin e ri nr. 39/2025, “Për kontrollin e kufirit shtetëror”.

Në dokumentin zyrtar të Këshillit të Ministrave saktësohet se qeveria vendosi:

“Propozimin e projektligjit ‘Për ratifikimin e marrëveshjes, ndërmjet Këshillit të Ministrave të Republikës së Shqipërisë dhe qeverisë së Republikës së Maqedonisë së Veriut, për ngritjen e pikave të përbashkëta të kalimit kufitar ndërmjet Republikës së Shqipërisë dhe Republikës së Maqedonisë së Veriut dhe kryerjen e veprimtarive të përbashkëta të kontrollit kufitar’, për shqyrtim e miratim në Kuvendin e Republikës së Shqipërisë, sipas tekstit dhe relacionit që i bashkëlidhen këtij vendimi.”

Vendimi mban firmën e Zëvendëskryeministres Albana Koçiu, e cila e ka nënshkruar në mungesë dhe me porosi të Kryeministrit Edi Rama, duke hyrë në fuqi menjëherë për efekt të procedurës së brendshme qeveritare.

Zbatimi dhe hyrja në fuqi e marrëveshjes

Nga ana tjetër, zbatimi në terren i kësaj marrëveshjeje do të fillojë vetëm pasi të përmbyllet i gjithë procesi legjislativ në Parlament. Projektligji i përcjellë Kuvendit parashikon ratifikimin e plotë të tekstit të marrëveshjes si pjesë përbërëse të tij.

Lidhur me afatin se kur ky ndryshim do të jetë i zbatueshëm, në Nenin 2 të projektligjit përcaktohet qartë se ky ligj hyn në fuqi 15 ditë pas botimit në ‘Fletoren zyrtare’.