Qeveria e Serbisë zgjat afatin për “studentët e vjetër”: studimet mund të përfundojnë edhe në vitin shkollor 2026/2027

Qeveria e Serbisë, në mandat teknik, miratoi sot në seancën e saj Konkluzionin me të cilin u jep pëlqimin institucioneve të arsimit të lartë që studentëve të regjistruar në studimet themelore, të integruara, master dhe doktoraturë, përkatësisht në shkollat e larta, deri më 10 shtator 2005 (sipas rregullave që vlenin deri në atë datë), t’u mundësojnë përfundimin e studimeve sipas planit mësimor të nisur, kushteve dhe rregullave të studimit.

Konkluzioni përfshin edhe kandidatët që kanë paraqitur disertacionin e doktoraturës deri më 10 shtator 2005: ata do të mund të marrin titullin shkencor “doktor shkence” edhe pas skadimit të afatit të garantuar me nenin 148 të Ligjit për Arsimin e Lartë, në përputhje me aktin e përgjithshëm të institucionit.

Përfundimi i vitit shkollor 2025/2026, përkatësisht i vitit 2026/2027 për studimet e integruara në fushën e shkencave mjekësore, janë të përcaktuara me nenin 148 të ligjit si afate të garantuara deri në të cilat institucionet e arsimit të lartë DETYROHEN t’u mundësojnë këtyre studentëve përfundimin e studimeve sipas planit të nisur.

Me të njëjtin konkluzion, Ministria e Arsimit ngarkohet që, brenda kompetencave të saj, të zbatojë të gjitha aktivitetet e nevojshme për t’u mundësuar këtyre studentëve dhe kandidatëve realizimin e të drejtave të fituara sipas Ligjit për Arsimin e Lartë. Një ditë më parë, Ministria u kishte dërguar fakulteteve vetëm rekomandime për shtyrjen e vitit akademik për studentët me afat të skaduar; vendimi i sotëm është akt formal i Qeverisë që e bën zgjatjen të detyrueshme për institucionet.

Burimi: Newsmax Balkans