Qeveria, kontakte me Brukselin për heqje të shpejtë të barrikadës

Qeveria e Kosovës ka intensifikuar veprimet dhe kontaktet me Brukselin në mënyrë që barrikada e rivendosur me lumin Ibër në Mitrovicë të hiqet sa më shpejt. Një gjë të tillë e ka konfirmuar edhe zv/kryeministrja e Kosovës, Edita Tahiri e cila ka deklaruar se Serbia ka pranuar që ta heq barrikadën në urën e Ibrit.
“Në bazë të informacionit zyrtarë që kamë pas nga Bashkimi Evropian, Serbia është pajtuar që ta heq barrikadën”, tha Tahiri, duke shtuar se barrikada do të hiqet shumë shpejt.

“Barrikada do të hiqet shpejt, sepse këto barrikada tregojnë se Seria ka shkelë marrëveshjen e Brukselit dhe Marrëveshjen për lëvizje të lirë. BE e njeh si shkelje të marrëveshjes. Ka rezultate dhe shumë shpejt do të hiqet”, tha zv/kryeministrja Tahiri për RTK.

Më tej, Tahiri ka thënë se nuk është problem Goran Rakic, por mentaliteti i Serbisë, që sipas saj është mentalitet i të shkuarës.

Ndërkohë, Kuvendi i Komunës së Mitrovicës së Veriut do të mblidhet në një seancë të jashtëzakonshme të premten, pas shkresës së Ministrisë së Administratës së Pushtetit Lokal, dërguar kryetarit të kësaj Komune, Goran Rakic, ku thuhet se ai ka shkelur ligjin me vendosjen e barrikadës mbi urë, të cilën serbët po e quajnë “Parku i Paqes”.

Me këtë veprim, Rakic ka shkelur Marrëveshjen e Brukselit, Kushtetutën dhe 5 ligje të Kosovës.

Nga kryetari i Komunës së veriut, këshilltarët komunalë shqiptarë do të kërkojnë sqarime lidhur me veprimet që ka ndërmarrë ai për rivendosjen e barikadës.