Rama në Durrës: Shqipëria e sotme është rezultat i punës së PS-së

Kryeministri Edi Rama ishte këtë të hënë pasdite në Durrës në një event me rastin e hapjes së ciklit të takimeve me socialistët për 35-vjetorin e PS-së.

Rama u shpreh krenar për Partinë Socialiste, duke thënë se rrugëtimi i Shqipërisë është njësuar me rrugëtimin e saj. Sipas tij, nëse Shqipëria është sot një Shqipëri tjetër, kjo vjen si meritë dhe vepër e socialistëve dhe e progresit shqiptar.

Ai tha se PS është bërë zëdhënësja e nevojave të vendit dhe njëkohësisht forca që i ka adresuar ato. Sipas tij, sot është e paimagjinueshme të flitet për një vend në kërkim të një stabiliteti të arsyeshëm, ndërsa dikur kjo ishte një nevojë themelore.

Rama u shpreh se PS e mishëron dhe garanton stabilitetin, duke shtuar se ishte ajo që e ringriti Shqipërinë nga rrëzimet e mëdha dhe kur vendi kishte nevojë për kurajo për të ndërmarrë reformat e nevojshme.

Sipas tij, nëse sot Shqipëria është më pranë se kurrë Bashkimit Europian, kjo vjen vetëm për një arsye të madhe: forca, përkushtimi dhe puna e PS-së.

Ai shtoi se PS tashmë është kthyer jo vetëm në forcë fituese, por dominuese në Durrës, Krujë, Shijak dhe në të gjithë qarkun e Durrësit, ndërsa theksoi se në zgjedhjet e fundit kjo forcë politike ka arritur rezultatin më të mirë ndonjëherë.

Kryeministri Edi Rama u shpreh se Partia Socialiste ka shënuar në ADN-në e saj atë që e bën një forcë “të patjetërsueshme dhe të pazëvendësueshme”, duke e lidhur këtë me raportin e saj me të shkuarën si asnjë forcë tjetër politike.

Sipas tij, që në themelimin e saj, PS është kujdesur të përcaktojë qartë se është një parti antifashiste, liberale dhe e lidhur ngushtë me vlerat e Luftës Nacionalçlirimtare, e cila sipas Ramës e vendosi Shqipërinë në krahun e duhur të historisë.

Nga ana tjetër, ai theksoi se PS ka të regjistruar në ADN-në e saj, që në hapat e parë, edhe raportin me atë pjesë të së shkuarës që lidhet me diktaturën komuniste. Rama u shpreh se të tjerët kanë luftuar dhe vazhdojnë të luftojnë edhe sot komunistët dhe jo komunizmin si sistem, ndërsa PS, sipas tij, ka vlerësuar komunistët për atë që kanë qenë, por ka refuzuar komunizmin për atë që ai ka prodhuar.

Rama nuk i kurseu as thumbimet ndaj kreut të PD-së, Sali Berisha, duke u shprehur se nuk është rastësi që sot, në anën tjetër vazhdon të mbijetojë, sipas tij, një “mbeturinë e komunizmit” në krye të asaj që e quajti “gabimisht opozitë”, ndërsa shtoi se forma më e keqe e komunizmit është komunisti antikomunist.