Rama: Shqipëria po zhvillon modelin e parë të AI për prokurimet publike, testimi synohet në 2027

Kryeministri Edi Rama ka bërë të ditur se Shqipëria po punon për zhvillimin e modelit të parë të inteligjencës artificiale për prokurimet publike, një projekt që, sipas tij, synon të rrisë transparencën dhe efikasitetin në administrimin e fondeve publike.

Gjatë fjalës së mbajtur në aktivitetin në kuadër të Javës së Administratës Publike, Rama tha se projekti po zhvillohet në bashkëpunim me disa prej kompanive dhe aktorëve më të mëdhenj të industrisë së teknologjisë.

Sipas kryeministrit, modeli ndodhet ende në fazën e zhvillimit. Nëse projekti rezulton i suksesshëm, ai pritet të testohet në mesin e vitit 2027 dhe të hyjë plotësisht në funksion gjatë vitit 2028.

“Kur të jetë efektiv, do ta heqë gjithë problematikën e tenderëve dhe kontratave për fondet publike. Do ta bëjë zero”, u shpreh Rama.

Kreu i qeverisë u ndal edhe te procesi i digjitalizimit të administratës publike, duke njoftuar se ka përfunduar digjitalizimi i plotë i dokumentacionit të Kadastrës.

Sipas tij, procesi është realizuar me mbështetjen e Bashkimit Evropian dhe në përputhje me afatet e përcaktuara në Planin e Ri të Rritjes.

Rama theksoi se faza e ardhshme do të jetë ndërtimi i sistemit që do ta kthejë Kadastrën në një shërbim plotësisht online, duke synuar lehtësimin e procedurave për qytetarët dhe bizneset.