Rama u takua ndaras me liderët shqiptarë në Maqedoninë e Veriut
Pas takimit me Ali Ahmetin, kryeministri shqiptar u takua në Manastir me bashkëkryetarët e VLEN-it, Izet Mexhitin dhe Bilall Kasamin.
Kryeministri i Shqipërisë, Edi Rama, zhvilloi takime të ndara me liderët shqiptarë gjatë vizitës së tij në Maqedoninë e Veriut, raporton Alsat.
Fillimisht Rama u takua me kryetarin e BDI-së, Ali Ahmetin. Kreu i opozitës shqiptare theksoi se në takim u diskutua për bashkëpunimin mes dy shteteve, integrimin evropian dhe çështjet me interes të përbashkët për shqiptarët. Sipas Ahmetit, takimi merr një domethënie të veçantë edhe për faktin se zhvillohet në Ditën e Alfabetit të Gjuhës Shqipe dhe në prag të 28 Nëntorit, Ditës së Flamurit dhe Pavarësisë së Shqipërisë.
Pas Ahmetit, kryeministri shqiptar u takua në Manastir me bashkëkryetarët e VLEN-it, Izet Mexhitin dhe Bilall Kasamin. “Festa e Alfabetit na bëri bashkë sot në Manastir. Biseduam për lidhjet që kemi ndërtuar ndër vite dhe për atë që mund të bëjmë sot që bashkëpunimi mes Shqipërisë dhe Maqedonisë së Veriut të ndihet më shumë në jetën e qytetarëve tanë”, ka shkruar Mexhiti.
Liderët e VLEN-it në Manastir u takuan edhe me kryeministrin e Kosovës, Albin Kurtin. Sipas Kasamit, bisedimet u përqendruan te zhvillimet aktuale politike, përfaqësimi politik i shqiptarëve në vend dhe bashkëpunimi rajonal, thekson Alsat.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.