Rama vizitë në Francë, pritet takimi me presidentin Macron

Kryeministri Edi Rama, ndodhet këtë të hënë në Francë në kuadër të një vizite zyrtare.

Siç raportohet, ai do të takohet me Presidentin francez, Emmanuel Macron, rreth orës 13:00, në Pallatin Élysée.

Nuk dihen më shumë detaje, ndërsa me gjasë në fokus të bisedimeve mes liderëve do jetë procesi i negociatave Shqipëri-Bashkimi Europian dhe investimet franceze. Jo më larg se më 17 qershor, Parlamenti Europian miratoi progres-raportin për vendin tonë duke rikonfirmuar mbështetjen në këtë rrugëtim.

“Shqipëria ka si objektiv që të anëtarësohet në BE brenda vitit 2030. Gjithashtu, objektivi është që negociatat të mbyllen brenda vitit 2027. Më shumë se 90% e qytetarëve të Shqipërisë e duan anëtarësimin”, deklaroi Raportuesi për Shqipërinë, Andreas Schieder.