Reuters: Vuçiq do garanci se Serbia hyn më 2025 në BE, pasi të bëjë marrëveshje me Kosovën
Presidenti serb Aleksandar Vuçiq ka thënë se do të kërkonte garanci se vendi i tij do të anëtarësohet në Bashkimin Europian në vitin 2025 si pjesë e ndonjë marrëveshjeje me Kosovën, e cila do t’u hapte rrugën të dy vendeve t’i bashkohen bllokut, raporton Reuters.
“Nëse arrijmë ndonjëherë marrëveshje (me Kosovën), Serbisë do t’i duhej një garanci e qartë që do të bëhet anëtare e BE’së më 2025”, ka thënë Vuçiq në intervistën për agjencinë britanike të lajmeve.
Vuciq mendon mund të duhen deri në 10 vjet për Beogradin dhe Prishtinën për të arritur një marrëveshje për shkak të dallimeve të shumta mes vendeve.
Kosova dhe Serbia kanë nisur më 2013 një dialog të ndërmjetësuar nga Bashkimi Europian për normalizimin e marrëdhënieve.
Një takim i paraparë të mbahej javën e kaluar në Bruksel ndërmjet presidentëve të Kosovës, Hashim Thaçi e atij serb, Aleksandar Vuçiq, i cili nuk u mbajt, do të shënonte fillimin e fazës së fundit të këtij dialogu.
Pala kosovare pret që dialogu të përfundojë me një marrëveshje, e cila do ta obligonte Serbinë ta njihte pavarësinë e saj dhe të mos pengojë anëtarësimin e saj në OKB dhe organizata të tjera.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.