Revolucioni i fotografisë: Dita kur Kodak ndryshoi mënyrën se si njerëzit ruanin kujtimet

Më 4 shtator 1888, George Eastman mori patentën për aparatin e tij fotografik Kodak, një shpikje që revolucionarizoi fotografinë dhe e bëri atë shumë më të qasshme për publikun e gjerë.

Kodak ishte një aparat i vogël në formë kutie, që mund të mbahej lehtësisht në dorë. Ai solli një ndryshim të madh krahasuar me pajisjet e rënda dhe komplekse që deri atëherë përdoreshin kryesisht nga fotografët profesionistë.

Një nga risitë kryesore të Eastmanit ishte përdorimi i filmit fleksibël. Kjo teknologji zëvendësoi pllakat fotografike prej xhami, të cilat ishin të rënda, të papërshtatshme për transport dhe kërkonin proces më të ndërlikuar të përpunimit.

Me aparatin Kodak, përdoruesi mund të realizonte deri në 100 fotografi. Pasi përfundonte filmin, ai e dërgonte të gjithë aparatin në fabrikën e Eastmanit në Rochester të Nju Jorkut.

Atje, teknikët përpunonin filmin, shtypnin fotografitë dhe ia kthenin pronarit aparatin të pajisur me një film të ri, gati për t’u përdorur sërish.

Ky koncept e thjeshtoi ndjeshëm fotografinë dhe e afroi atë me njerëzit që nuk kishin njohuri profesionale për procesin fotografik.

Filozofia e re u përmblodh në sloganin që u bë i famshëm në historinë e fotografisë:

“Ju shtypni butonin, pjesën tjetër e bëjmë ne”.

Me Kodak-un, fotografia nisi të shndërrohej nga një proces i ndërlikuar profesional në një mënyrë të thjeshtë për të dokumentuar jetën e përditshme dhe për të ruajtur kujtimet.