Rinisin lëvizjen trenat grekë/ Dyfishohet personeli për të rritur sigurinë e lëvizjes
“Ne do të bëjmë gjithçka që është e mundur nga ana njerëzore për të rifituar besimin e pasagjerëve tanë. Duke pasur parasysh se hekurudha është mjeti i transportit më miqësor ndaj mjedisit , rifillimi i shpejtë dhe më i sigurt i saj meriton të gjithë mbështetjen tonë”, ka thënë CEO i operatorit hekurudhor Panagiotis Terezakis.
Pasagjerët e parë që kanë hipur në vagone kanë deklaruar se shpresojnë që pas ngjarjes tragjike në luginën e Tempit udhëtimi të jetë më i sigurt.
Aksidenti ka shkaktuar zemërim publik dhe protesta masive për kushtet e këqija të sigurisë në operatorin hekurudhor , një kompani thuajse e rrënuar nga kriza financiare dhjetëvjeçare, neglizhenca, investimet e pamjaftueshme dhe mungesa e personelit dhe infrastrukturës së sinjalizimit.
Ndërkohë që hetimi për ngjarjen tragjike vazhdon dhe katër punonjës të hekurudhave, midis tyre edhe shefi i stacionit të Larisës , janë në paraburgim, janë përshkallëzuar edhe debatet politike midis partive opozitare dhe qeverisë, për shkaqet dhe përgjegjësinë politike të kësaj tragjedie.
