“Sa e pasjellshme” – Ariana Grande përballet me kritika pas videos virale

Një video e vitit 2013 me Ariana Grande është rikthyer në qendër të vëmendjes, duke shkaktuar reagime të shumta në rrjetet sociale.

Pamjet, të filmuara gjatë Style Awards, tregojnë këngëtaren teksa pozon në tapetin e kuq. Në një moment, ajo duket se i kërkon një gruaje, që besohet të ketë qenë pjesë e stafit të eventit, të largohet nga rruga duke i bërë shenjë me dorë.

Menjëherë pasi gruaja largohet, Grande duket se kupton reagimin e saj, mbulon fytyrën me duar dhe qesh, një veprim që disa e interpretuan si siklet ose pendesë.

Videoja u ripublikua këtë javë në platformën X dhe u bë virale, duke grumbulluar miliona shikime. Shumë përdorues e kritikuan këngëtaren, duke e cilësuar sjelljen e saj si arrogante dhe të pasjellshme.

Megjithatë, një pjesë e fansave dolën në mbrojtje të artistes, duke argumentuar se gruaja po i bllokonte rrugën në tapetin e kuq dhe se Ariana thjesht po përpiqej të kryente detyrimet e saj gjatë eventit.

Debati vjen vetëm pak ditë pasi Ariana Grande njoftoi shtyrjen e tre koncerteve të turneut të saj “Eternal Sunshine Tour” për arsye që lidhen me prodhimin e shfaqjes.

Vendimi shkaktoi pakënaqësi te disa fansa, veçanërisht ata që kishin udhëtuar nga vende të ndryshme për të ndjekur koncertet.