Seri vjedhjesh në Tetovë: katër të dyshuar vodhën para, ar dhe armë për rreth 250 mijë euro — u mor edhe një sef 400 kg

Prokuroria Themelore Publike e Tetovës ka hapur procedurë ndaj katër personave të dyshuar për veprën penale të vazhduar ‘vjedhje e rëndë’, sipas nenit 236 paragrafi 3 në lidhje me paragrafin 1 pika 2 dhe nenit 45 të Kodit Penal.

Sipas prokurorisë, nga prilli deri në shtator të këtij viti të katërtit kanë kryer një sërë vjedhjesh të rënda në fshatrat e Komunës së Bogovinës, duke thyer më shumë se 10 shtëpi nga ku morën para, bizhuteri ari dhe lloje të ndryshme armësh zjarri që pronarët i mbanin me leje.

Në një nga vjedhjet, në fshatin Pallçisht, hajdutët arritën të nxirrnin nga shtëpia e të dëmtuarit një sef me peshë rreth 400 kilogramë. Vlera totale e sendeve të vjedhura deri tani vlerësohet në rreth 15 milionë denarë (rreth 250 mijë euro).

Prokurori publik po vepron intensivisht për sigurimin e provave për të gjitha rastet. Ndërkohë, me propozim të prokurorisë, dy prej të dyshuarve u është caktuar paraburgim afatshkurtër prej 48 orësh deri në sigurimin e plotë të provave, ndërsa pas dy të tjerëve po kërkohet dhe paraburgimi do t’u llogaritet nga momenti i gjetjes dhe privimit nga liria.

Burimi: Fokus