SHBA – 500 raketa “Patriot” për Ukrainën, Uashingtoni miraton marrëveshjen me vlerë 2,1 miliardë dollarë

– Shtetet e Bashkuara të Amerikës kanë miratuar shitjen e 500 raketave interceptuese të sistemit të mbrojtjes ajrore “Patriot” për Ukrainën, në një marrëveshje me vlerë rreth 2,1 miliardë dollarë, raportoi “Reuters”.

Departamenti Amerikan i Shtetit njoftoi sot se bëhet fjalë për raketa të modelit PAC-3 MSE, të cilat përdoren për të goditur dhe shkatërruar raketat balistike dhe kërcënimet e tjera ajrore përpara se të arrijnë objektivat e tyre.

Sipas autoriteteve amerikane, marrëveshja do të financohet tërësisht nga vendet aleate dhe partnerët e Ukrainës.

Kanadaja, Gjermania dhe Norvegjia do të kontribuojnë financiarisht përmes programit amerikan JUMPSTART, ndërsa një pjesë e financimit do të sigurohet nga fondet kombëtare të lidhura me kredinë e Bashkimit Evropian për mbështetjen e Ukrainës.

Departamenti Amerikan i Shtetit theksoi se nuk do të përdoren fonde amerikane për këtë blerje.

Paketa përfshin gjithashtu pjesë këmbimi, pajisje të tjera teknike dhe mbështetje logjistike për mirëmbajtjen dhe funksionimin e raketave.

Kompania amerikane “Lockheed Martin” do të jetë kontraktori kryesor për këtë marrëveshje.

Miratimi vjen në një moment kur Ukraina po përballet me mungesë të raketave interceptuese për sistemet “Patriot”, të cilat janë ndër mjetet më efektive për të ndaluar sulmet me raketa balistike ruse.

Presidenti ukrainas Volodymyr Zelensky deklaroi në fillim të kësaj jave se vendi i tij kishte pritur për gati një muaj miratimin amerikan për furnizimin me raketa për sistemet “Patriot” dhe “NASAMS”.

Zelensky paralajmëroi gjithashtu se Ukraina po përballej me vështirësi serioze, për të siguruar sasinë e nevojshme të municioneve për mbrojtjen ajrore, ndërsa Rusia ka intensifikuar sulmet ndaj infrastrukturës energjetike dhe qyteteve ukrainase.

Megjithatë, miratimi i shitjes nuk do të thotë se raketat do të mbërrijnë menjëherë në Ukrainë. Afati i dorëzimit nuk është bërë ende publik dhe furnizimi mund të kërkojë kohë.

Marrëveshja synon të forcojë aftësinë e Ukrainës për t’u mbrojtur nga sulmet ajrore dhe raketore ruse, në një periudhë kur Kievi po kërkon më shumë mbështetje ushtarake nga aleatët perëndimorë. /