SHBA – Bisedë e ashpër mes Trump dhe Netanyahut, kryeministri izraelit kërkon sulme ndaj Iranit pas zgjedhjeve

– Presidenti amerikan, Donald Trump dhe kryeministri izraelit, Benjamin Netanyahu zhvilluan të shtunën një bisedë telefonike për situatën me Iranin dhe mundësinë e rifillimit të operacioneve ushtarake kundër Teheranit.

Sipas një raportimi të publikuar nga “Axios”, duke cituar burime amerikane dhe izraelite, Netanyahu po i kërkon Trump që Shtetet e Bashkuara të Amerikës të ndërmarrin sulme ndaj Iranit menjëherë pas zgjedhjeve të mesmandatit në SHBA, të cilat zhvillohen më 3 nëntor.

Megjithatë, Trump duket se preferon t’u japë më shumë kohë negociatave diplomatike me Teheranin, një qëndrim që ka shkaktuar shqetësim te kryeministri izraelit.

Biseda u zhvillua në një moment kur administrata amerikane po shqyrton njëkohësisht mundësinë e arritjes së një marrëveshjeje me Iranin dhe përgatitjet për rifillimin e luftimeve, nëse përpjekjet diplomatike dështojnë.

Nga ana e tij, Trump u shpreh të shtunën se negociatat me Iranin po shkonin mirë dhe se nuk kishte arsye për të nxituar një vendim ushtarak.

“Negociatat po ecin mirë”, deklaroi presidenti amerikan, duke shtuar se nuk ishte “me shumë nxitim” për të arritur një marrëveshje.

Megjithatë, ai shprehu rezerva për besueshmërinë e autoriteteve iraniane, duke thënë se ato mund të arrijnë një marrëveshje dhe më pas të tërhiqen prej saj.

Trump paralajmëroi gjithashtu se SHBA-ja duhet të neutralizojë edhe një ose dy objekte bërthamore në Iran.

Mes tyre përmendi Malin e Kamzës, ku dyshohet se ndodhet një objekt bërthamor i ndërtuar thellë nën tokë.

Sipas “Axios”, presidenti amerikan po ndjek një strategji me dy drejtime: nga njëra anë, përpjekjet për të arritur një marrëveshje diplomatike dhe për të rifilluar bisedimet e paqes dhe, nga ana tjetër, përgatitjet për mundësinë e rikthimit të operacioneve të mëdha ushtarake pas zgjedhjeve të mesmandatit.

Javën e kaluar, zëvendëspresidenti amerikan JD Vance i dërgoi një letër kreut të Këshillit të Sigurisë Kombëtare të Iranit, Mohsen Rezaei, lidhur me mundësinë e rifillimit të negociatave. Ky ishte kontakti i nivelit më të lartë mes dy vendeve prej disa muajsh.

Ndërkohë, Katari po përpiqet të ndërmjetësojë mes Uashingtonit dhe Teheranit.

Përfaqësuesit e tij u takuan dje me zyrtarë iranianë për të tretën ditë radhazi, me synimin për të arritur një marrëveshje që do të mundësonte rifillimin e negociatave të drejtpërdrejta mes SHBA-së dhe Iranit.

Ministri i Jashtëm iranian, Abbas Araghchi, deklaroi se ende nuk kishte një marrëveshje, por se Teherani po bënte përpjekje për të gjetur një zgjidhje diplomatike.

“Shpresojmë që pala tjetër të tregojë racionalitet të mjaftueshëm për të zgjedhur diplomacinë në vend të rrugëve të tjera”, u shpreh ai.

Sipas burimeve të cituara nga “Axios”, telefonata mes Trump dhe Netanyahut u përshkrua si “e ashpër” nga pala izraelite dhe si “e drejtpërdrejtë” nga pala amerikane. Shtëpia e Bardhë dhe zyra e kryeministrit izraelit nuk pranuan të komentojnë përmbajtjen e bisedës.

Telefonata vjen në një moment delikat për marrëdhëniet mes dy aleatëve, pasi Netanyahu kërkon një përgjigje më të shpejtë ushtarake ndaj Iranit, ndërsa Trump po përpiqet të mbajë të hapur mundësinë e një marrëveshjeje diplomatike. /