SHBA – Trump kërcënon me ndalimin e pjesshëm të tregtisë nëse “Fed” nuk ul normat e interesit

UASHINGTON, 4 shtator /ATSH-DPA/- Presidenti i SHBA-së, Donald Trump ka kërcënuar se do të ndalojë tregtinë me disa vende, nëse Rezerva Federale amerikane (Fed) nuk ul normat e interesit.

“Ulni normën e interesit ose do të ndaloj tregtinë me vendet me të cilat kemi deficit”, shkroi sot Trump në platformën e tij “Truth Social”.

Trump argumentoi se tregu i punës në SHBA është më i fortë nga sa pritej, ndaj sipas tij “Fed” duhet të ulë normat e interesit.

Megjithatë, ekonomistët paralajmërojnë se një treg i fortë pune, mund të rrisë pagat dhe, si pasojë, edhe inflacionin.

Tregu i punës më i fortë nga sa pritej

Sipas të dhënave të fundit, në gusht në SHBA u shtuan 162 mijë vende pune, ndërsa ekonomistët prisnin vetëm rreth 55 mijë.

Normat më të ulëta të interesit, mund t’i ndihmojnë kompanitë, të investojnë dhe të rriten më shpejt, por njëkohësisht mund të shtojnë presionin mbi çmimet dhe inflacionin.

Trump nuk shpjegoi qartë se si një ulje e normave të interesit do të lidhej me deficitin tregtar, pra situatën kur SHBA-ja importon më shumë mallra nga një vend sesa eksporton drejt tij.

“Fed” është banka qendrore e SHBA-së dhe vendos normat bazë të interesit, të cilat ndikojnë në koston e kredive, investimeve dhe në inflacion. /