SHBA vendos sanksione të reja ndaj firmave indiane dhe turke për ndihmë ndaj Iranit

Departamenti amerikan i Thesarit vendosi të mërkurën sanksione të reja ndaj kompanive dhe individëve me bazë në Indi dhe Turqi për mbështetjen e tyre ndaj Iranit, duke paralajmëruar se do të vazhdojë të ndjekë këdo që mbështet qeverinë iraniane, siç njofton Reuters. Sanksionet janë pjesë e operacionit “Economic Outcast” të administratës Trump, që synon t’ia ndërpresë Iranit mundësinë për të shitur naftë me qëllim financimin e luftës me Shtetet e Bashkuara dhe Izraelin.

Në shënjestër të veprimit të së mërkurës ishte, sipas Thesarit, “rrjeti i gjerë kriminal” i drejtuar nga indiani Suniel Kumar Sharma, bashkëshortja e tij Jaspreet Preeti Shahid dhe dy shtetas të tjerë indianë që drejtojnë dy nga bizneset e çiftit, si edhe nëntë entitete të veçanta të lidhura me Sharma-n. Sipas departamentit, skemat e tyre kanë ofruar flamuj të rremë dhe certifikata false për anijet e sanksionuara që transportonin naftë iraniane, përfshirë anije që operonin në emër të ushtrisë iraniane dhe grupeve të mbështetura prej saj.

Sharma dhe Shahid, me bazë në Chandigarh të Indisë, pretendonin në mënyrë mashtruese se përfaqësonin vende si Guajana, Eswatini dhe Laosi në lëshimin e flamujve dhe certifikatave, ndërsa rrjeti i tyre blinte domene interneti dhe ndërtonte faqe që pretendonin se ofronin në emër të këtyre vendeve shërbime regjistrimi flamuri, trajnimi dhe certifikimi detarësh e klasifikimi anijesh. Thesari sanksionoi gjithashtu kompaninë turke Fugo Ground Services Inc për mbështetjen e vazhdueshme ndaj sektorit të aviacionit iranian, të goditur rëndë nga sanksionet: kompania u ofronte shërbime në tokë disa linjave ajrore iraniane të sanksionuara nga SHBA-ja që vazhdonin të fluturonin drejt Turqisë, mes tyre Iran Air Tour, Saha Airlines, Taban Airlines dhe Ata Airlines.

“Ne e dimë ku jeni dhe do t’i sanksionojmë ata që vazhdojnë ta mbështesin regjimin iranian, qoftë nga toka, deti apo ajri”, tha sekretari i Thesarit, Scott Bessent, në një deklaratë. Zyra e Kontrollit të Pasurive të Huaja (OFAC) lëshoi njëkohësisht një alarm të ri për industrinë, duke paralajmëruar për rrezikun e sanksioneve nga marrëdhëniet me anije që mund të mbajnë flamuj të rremë; sipas Thesarit, flamujt dhe certifikatat false u lejojnë anijeve të shmangin rregullat ndërkombëtare të sigurisë dhe mjedisit, pa sigurim dëmshpërblimi.

Sanksionet e reja u shpallën një ditë pasi demokratët shënuan fitore të mëdha në zgjedhjet e mesmandatit, duke marrë kontrollin e të dy dhomave të Kongresit, ndërsa votuesit shprehën zemërim për luftën me Iranin dhe ndikimin e saj në rritjen e inflacionit në SHBA. Thesari kishte thënë javën e kaluar se veprimet e tij po e shkatërronin ekonominë e Iranit, duke e çuar monedhën rial në nivele të reja të ulëta dhe inflacionin vendas rreth 90 për qind; lëvizja e së mërkurës e shtrëngon më tej presionin mbi shitjet e naftës iraniane, pasi SHBA-ja rivendosi më 14 korrik bllokadën e porteve iraniane, pas dështimit të memorandumit të mirëkuptimit mes Teheranit dhe Uashingtonit për t’i dhënë fund luftës.