SHBA zhvendos diplomatë dhe familje nga disa ambasada në Lindjen e Mesme mes frikës për përshkallëzim me Iranin

Shtetet e Bashkuara po nxitojnë të zhvendosin disa diplomatë dhe anëtarë të familjeve të tyre nga postet diplomatike në Lindjen e Mesme, ndërsa rritet frika për një përshkallëzim rajonal, siç raporton CNN duke cituar disa burime të njohura me çështjen.

Një memo e paklasifikuar e datës 23 tetor, drejtuar sekretarit të Shtetit Marco Rubio, thotë se inteligjenca amerikane ka konstatuar se “Irani i ka rritur ndjeshëm përpjekjet për të goditur personelin amerikan” dhe se përpjekjet për komplote “kanë arritur faza të avancuara në Lindjen e Mesme dhe në disa vende të tjera”. Memoja u raportua fillimisht nga Axios.

Një zyrtar amerikan i tha CNN-së se kërcënimi i sulmeve të Huthi-ve dhe i komploteve terroriste iraniane që synojnë zyrtarët amerikanë po ndikon në vendimet për rregullimet e stafit në ambasadat me status operacionesh të kufizuara në rajon. Këtë javë, Departamenti i Shtetit urdhëroi largimin e personelit jo thelbësor dhe të gjithë anëtarëve të familjeve nga Arabia Saudite, si reagim ndaj përshkallëzimit të sulmeve të Huthi-ve, dhe po rregullon në heshtje kufijtë e stafit në Jordani, Bahrein, Kuvajt, Katar, Emiratet e Bashkuara Arabe dhe Liban.

Një zyrtar i Departamentit të Shtetit konfirmoi më vonë se Libani, Emiratet, Katari dhe Jordania do të shohin ndryshime të përkohshme të nivelit të stafit nën statusin e operacioneve të kufizuara, ndërsa për Kuvajtin dhe Bahreinin nuk ka ndryshime. Ndryshe nga rasti i Arabisë Saudite, këto lëvizje nuk u njoftuan publikisht.

“Të thuash se ka qenë kaotike është pak”, tha një diplomat amerikan, ndërsa zëdhënësja e Shoqatës Amerikane të Shërbimit të Jashtëm, Nikki Gamer, deklaroi se situata i ngjan kaosit të përjetuar nga familjet në fillim të këtij viti: “Disa mezi ishin vendosur sërish, kur iu tha të largoheshin përsëri. Ata janë të mërzitur, të hutuar dhe të zemëruar, me arsye.” Departamenti i Shtetit tha të premten se personeli i punësuar drejtpërdrejt dhe familjet e tyre do të marrin mbështetje financiare për dietat, akomodimin dhe shkollimin sipas normave qeveritare.

Lëvizjet vijnë ndërsa Huthi-t kanë shtuar sulmet ndaj Arabisë Saudite, presidenti Donald Trump ka lënë të kuptohet se SHBA-ja mund të rifillojë goditjet kundër Iranit pas zgjedhjeve afatmesme, dhe Izraeli ka lobuar pa sukses për veprime më të menjëhershme.