Shpërthimet në Marinzë, sot raporti i grupit të punës

Ministria e Energjetikës pritet të zhvillojë sot një mbledhje emergjente, ku do të publikojë raportin për shkaqet që çuan në shpërthimin e puseve të naftës në Marinzë të Fierit.

Raporti i grupit të punës pritet t’i japë përgjigje shumë prej pyetjeve ngritur javën e fundit, lidhur me aktivitetin e kompanisë naftënxjerrëse “Bankers Petroleum”.

Raporti pritet të dalë pas mbledhjes që do të mbahet në Ministrinë e Energjetikës, ku do të jenë të pranishëm drejtuesit e Albpetrol dhe AKBN-së. Në raport do të dalë edhe aspekti teknik se çfarë ndodhi në Marinzë.

Gjithashtu pritet të vendoset edhe në lidhje me penalitetet, masat dhe përgjegjësitë, që ka ose jo kompania kanadeze “Bankers Petroleum”.

Më 1 prill banorët e fshatit Marinzë të Fierit u vunë në rrezik, pas shpërthimit të gazit nga dy puset e naftës. Shumë prej familjeve që banonin pranë vendit të ngjarjes u evakuuan, ndërkohë që shtëpitë e tyre tashmë janë të dëmtuara.