Shpresa për marrëveshje SHBA–Iran ul ndjeshëm çmimin e naftës në tregjet globale

Shpresa për një marrëveshje mes Shteteve të Bashkuara dhe Iranit ka bërë që çmimi i naftës në tregjet globale të bjerë ndjeshëm këtë të hënë. Në orët e para të ditës, një fuçi naftë është shkëmbyer për rreth 97 dollarë ndërsa nafta e tregtuar nga Shtetet e Bashkuara ka shënuar rënie prej 5.9 për qind, në 90.93 dollarë për fuçi.

Ngushtica e Hormuzit, përmes së cilës kalon rreth një e pesta e naftës globale dhe gazit natyror të lëngshëm, ka qenë e mbyllur që nga nisja e konfliktit më 28 shkurt.

Sekretari amerikan i Shtetit, Marco Rubio, ka deklaruar se negociatorët kishin “diçka solide në tryezë” dhe se një marrëveshje mund të arrihej ditën e hënë.

“Jemi ende duke punuar. Në fillim menduam se do të kishim një lajm të mirë dje, por ndoshta do ta kemi sot”, ka deklaruar Rubio nga kryeqyteti indian, Delhi.

Komentet e tij kanë ardhur pasi presidenti Trump tha se marrëveshja do të përfshinte rihapjen e Ngushticës së Hormuzit, por se kishte udhëzuar negociatorët të mos nxitonin për arritjen e saj.

Nga ana tjetër, Irani ka deklaruar se në bisedime është arritur progres, por nuk mund të thuhet ende se marrëveshja është afër.

Tregjet globale të energjisë kanë përjetuar luhatje të forta çmimesh që nga fillimi i marsit, kur Irani kërcënoi se do të sulmonte anije që përdornin Ngushticën e Hormuzit, në shenjë hakmarrjeje ndaj sulmeve amerikano-izraelite ndaj vendit.