“S’kam lidhje”, Sajmir Kolaveri mohon se ka gisht në vrasjen e Klevis Lleshit

Gjykata e Posaçme ka lënë në fuqi masës e sigurimit “arrest në burg” të dhënë më herët në mungesë për Sajmir Kolaverin sot në 7 qershor.

Ai u ekstradua një ditë me parë nga Italia, pasi ishte i shpallur në kërkim për dyshimet se është i përfshirë në vrasjen dhe zhdukjen e kufomës së Klevis Lleshit në vitin 2020 në Burrel.

Lajmi bëhet me dije nga gazetarja e Klan News Glidona Daci.  

Kolaveri dyshohet për veprat penale “vrasje për gjakmarrje”, “Fshehja ose asgjësimi i kufomës”, grup i strukturuar kriminal, kryerja e veprave penale nga grupi i strukturuar kriminal dhe organizata kriminale.

Kolaveri është familjar i  A.H, po ashtu i shpallur në kërkim për dyshimet si urdhërues i vrasjes së Klevis Lleshit.

Gjatë zhvillimit të seancës, Sajmir Kolaveri nuk i ka pranuar akuzat e prokurorisë, duke pretenduar se s’ka lidhje me ngjarjen.

Sipas hetimeve, 44-vjeçari dyshohet se më 5 gusht 2020 ka bashkëpunuar me pjesëtarë të tjerë të grupit kriminal për vrasjen e Klevis Lleshit  Pas ekzekutimit, ai dyshohet se ka marrë pjesë edhe në transportimin dhe varrosjen e kufomës në fshatin Shpërdhet të Mamurrasit, me qëllim fshehjen e krimit.