SPAK çon në gjykim 44-vjeçarin rus për kërcënimin me bombë në Rinas

Prokuroria e Posaçme Antikorrupsion (SPAK) ka mbyllur hetimet dhe ka dërguar për gjykim Vladislav Urban, 44 vjeç, shtetas rus, i akuzuar për veprën penale “kanosje për kryerjen e veprave me qëllime terroriste”.

Sipas shqiptarja, në shkurt 2023 ai i ka dërguar një e-mail shefit operacional të Rinasit, ku kërcënonte se do të shpërthente një bombë nëse qeveria shqiptare nuk e njeh Kosovën si pjesë të Serbisë, dhe në të pretendonte gjithashtu se kishte marrë peng dy shtetas shqiptarë.

Hetimet tregojnë se e-maili ka qenë i dërguar nga i pandehuri, i cili rezulton rezident në Selanik. Pas shkëmbimit të informacionit me autoritetet greke dhe verifikimeve, u konstatua se nuk ishte marrë asnjë person peng, ndërsa në dosje rezultojnë edhe raste të mëparshme të dërgimit të mesazheve kërcënuese nga i njëjti individ.

Rasti i është dërguar gjykatës nga SPAK, raporton shqiptarja. Çdo person konsiderohet i pafajshëm deri në provimin e fajësisë me vendim të formës së prerë.