Statistikat/ Milani me mesatare për Serie B, bilanci horror i Allegri-t në fazën e dytë ka një precedent

Faza edytë e sezonit për Milani-n e Allegri-t ka qenë për t’u harruar. Një fakt të tillë e dëshmojnë edhe numrat e koleksionuar nga kuqezinjtë, të cilët në pjesën e dytë të sezonit kanë grumbulluar vetëm 25 pikë. Kjo shifër është edhe më e vogël se ajo e koleksionuar nga Conceiçao një vit më parë pas po të njëtit numër takimesh. Portugezi vitin e kaluar kishte fituar Superkupën e Italisë dhe ishte kualifikuar në finalen e Kupës së Italisë (të humbur përballë Bologna). Që prej sezonit 2018/2019 e deri më sot asnjë trajner i milani-t nuk ka bërë më keq se Allegri mes javëve 19-36.

Nëse fokusohemi në tetë javët e fundit bilanci rëndohet edhe më shumë. Pas fitores në derbi më tetë mars, Milani ka koleksionuar vetëm dy fitore, pesë humbje dhe një barazim. Shtatë pikët në tetë javë tregojnë qartë se “Djalli” ecën më ritmin e skuadrave kandidate për Serie B. Në këtë periudhë më keq se Milani kanë bëre vetëm Verona (2 pikë), Pisa (3) dhe Leçe (5). Për Allegri-n rënia vertikale në fazën e dytë të një sezoni nuk është diçka e re. Bilanci edhe më negativ ai ka përjetuar në Torino me Juventus-in gjatë sezonit 2023/2024. Gjatë fazës së parë në atë vit “Zonja” koleksionoi 46 pikë në 19 ndeshje ndërsa në fazën e dytë grumbulloi 21 pikë në 17 ndeshje.