STRASBURG – Komisioni Evropian planifikon moshën minimale 13 vjeç për përdorimin e rrjeteve sociale

STRASBURG, 16 shtator /ATSH-DPA/ – Komisioni Evropian planifikon të ndalojë përdorimin e rrjeteve sociale për fëmijët nën moshën 13-vjeçare, deklaroi sot presidentja e Komisionit Evropian, Ursula von der Leyen.

“Jam e vetëdijshme se shumë njerëz e perceptojnë fuqinë e gjigantëve të teknologjisë si dërrmuese dhe të pamundur për t’u frenuar. Unë nuk jam dakord me këtë”, tha Von der Leyen në një fjalim drejtuar ligjvënësve të BE-së në Strasburg.

Sipas këtyre planeve, fëmijët do të kenë qasje në rrjetet sociale nën mbikëqyrjen e prindërve duke filluar nga mosha 13-vjeçare, por do të mund të krijojnë një llogari personale vetëm pasi të mbushin 15 vjeç.

Platformat kryesore të rrjeteve sociale tashmë e kanë përcaktuar moshën minimale 13 vjeç në kushtet dhe rregullat e tyre të përdorimit.

Megjithatë, rregullatorët e BE-së i kanë kritikuar ato vazhdimisht për dështimin në zbatimin e këtij kufiri moshe.

Projektligji pritet të prezantohet më hollësisht të enjten.

Më pas, Parlamenti Evropian dhe vendet e BE-së do ta shqyrtojnë dhe do të propozojnë ndryshime në këtë propozim. Mund të duhen muaj apo edhe vite para se të arrihet një marrëveshje për versionin përfundimtar të ligjit./ a.jor.