Suedia kufizon përdorimin e “ChatGPT” dhe “Claude” për zyrtarët qeveritarë

– Suedia ka bllokuar përdorimin e versioneve të inteligjencës artificiale “ChatGPT” dhe “Claude” përmes shfletuesit të internetit në kompjuterët e punës të punonjësve të administratës qeveritare, raportoi “Euronews”.

Masa ka hyrë në fuqi sot, për shkak të shqetësimeve lidhur me sigurinë e informacionit dhe mbrojtjen e të dhënave konfidenciale.

Vendimi prek Zyrat Qeveritare të Suedisë, një strukturë që përfshin zyrën e kryeministrit dhe ministritë.

Punonjësit do të orientohen drejt përdorimit të “Microsoft Copilot”, një mjet i inteligjencës artificiale që është shqyrtuar nga autoritetet dhe është miratuar për përdorim në këtë mjedis pune.

Sipas autoriteteve suedeze, shqetësimi kryesor lidhet me përdorimin e platformave të inteligjencës artificiale pa marrëveshje të posaçme, që përcaktojnë mënyrën e përpunimit dhe mbrojtjes së të dhënave.

Futja e informacioneve të ndjeshme në këto shërbime, mund të krijojë rreziqe për sigurinë e informacionit shtetëror, veçanërisht kur nuk ka garanci të qarta për mënyrën se si ruhen dhe përdoren të dhënat.

Mikael Wettercrantz, drejtor i Digjitalizimit në Zyrat Qeveritare të Suedisë, ka paralajmëruar se përdorimi i shërbimeve të inteligjencës artificiale pa marrëveshje përkatëse, mund të ketë pasoja për sigurinë e informacionit.

Vendimi vjen pas një shqyrtimi të përdorimit të mjeteve të inteligjencës artificiale nga punonjësit e Administratës Suedeze të Transportit.

Një auditim i brendshëm në këtë institucion, evidentoi raste të përdorimit problematik të disa platformave, duke ngritur shqetësime si për ndjeshmërinë e informacioneve të futura në to, ashtu edhe për mënyrën se si janë trajtuar përgjigjet e gjeneruara nga inteligjenca artificiale.

Përpara vendosjes së kufizimit, autoritetet suedeze shqyrtuan edhe sigurinë e “Microsoft Copilot” dhe forcuan masat mbrojtëse të këtij mjeti.

Përdorimi i tij mbështetet në një marrëveshje me “Microsoft”, e cila përcakton kushtet e sigurisë dhe të përpunimit të të dhënave.

Megjithatë, masa nuk nënkupton ndalimin e plotë të “ChatGPT” dhe “Claude” në administratën suedeze.

Një numër i kufizuar punonjësish do të vazhdojnë të kenë qasje në këto shërbime, përmes një platforme të posaçme për asistentët e inteligjencës artificiale, të ndërtuar për institucionet suedeze.

Kufizime të ngjashme janë vendosur edhe në Agjencinë Suedeze të Taksave dhe në Bordin Kombëtar të Kujdesit Institucional.

Ndërkohë, Autoriteti Suedez i Zbatimit të Ligjit po shqyrton mundësinë e marrjes së masave të ngjashme.

“ChatGPT” dhe “Claude” i bashkohen kështu “DeepSeek”, në listën e mjeteve të inteligjencës artificiale, përdorimi i të cilave është kufizuar në administratën suedeze për arsye të sigurisë së të dhënave. /