Takimi i parë Mal i Zi–Kroaci për anijen ‘Jadran’ më 9 tetor në Zagreb

Podgorica dhe Zagrebi u dakordësuan për mbajtjen e takimit të parë mes komisioneve të të dy vendeve për çështjen e anijes shkollore “Jadran”. Takimi do të mbahet më 9 tetor në Zagreb të Kroacisë.

Komisionin malazez e kryeson ministri i Mbrojtjes, Dragan Krapoviq. Sipas tij, pas takimit të parë në Zagreb, takimi i radhës pritet të organizohet në Mal të Zi.

Duke folur për Televizionin e Malit të Zi (RTCG), Krapoviq tha se qëndrimi i Podgoricës nuk ka ndryshuar: anija i përket Malit të Zi — vijimësi e qëndrimit të të gjitha qeverive malazeze. Kroacia, nga ana tjetër, mban qëndrimin se porti amë i “Jadran”-it është Spliti, pra anija i përket Kroacisë.

Krapoviq hodhi poshtë idenë e menaxhimit të përbashkët të anijes, duke argumentuar se një anije lufte ose shkollore mund të lundrojë vetëm nën një flamur. Megjithatë, shtoi ai, Podgorica mbetet e hapur për stërvitje të përbashkëta.

Ai mohoi gjithashtu propozimet e tjera publike, si krijimin e një qendre përsosmërie të NATO-s, duke i cilësuar si të pamundura sipas rregullave ndërkombëtare.

Ministria e Punëve të Jashtme kroate nuk dha përgjigje për qëndrimin e saj përpara nisjes së negociatave.

Burimi: RTCG